Afrika Esperanto-Instituto anoncas la dekan Afrikan Esperantologian Staĝon, okazontan en Bujumburo ĉe la Tanganika Esperanto-Domo dum du longaj semajnfinoj en decembro 2024: 6a-8a kaj 13a-15a. La celo de la deka AfrES estas formadi organizantojn de kongresoj, konferencoj, simpozioj. Pri la programo kunlaboras la Kongresa Buroo de la Esperanta Civito.
La partopreno estas rezervita al la personoj havantaj la esperantan civitanecon, ĉar el la deka AfrES originos la organiza komitato de la Esperantaj Konferencoj en Afriko. La unua EKA estas ekpreparata en Burundio, por la jarfino 2025. Dum AfrES eblos diplomiĝi pri la niveloj B2 kaj C1 de LTSEC, kaj por tio ne necesas la civitaneco.
La trejnadon gvidos c-ano Giorgio Silfer. Tiu ĉi AfrES estas lia lasta: la estontajn prizorgos aliaj trejnistoj, kvankam li mem ne lasas la Plenum-Komitaton de Afrika Esperanto-Instituto.
Informas: aei [ĉe] esperantio [punkto] net (aei[at]esperantio[dot]net)