La bilanco kaj spezkalkulo 2023 de la Junulara pretas kun granda malfruo, sed donas pozitivan surprizon: post la deficito de preskaŭ 48.000 eŭroj fine de 2022, jen profito de preskaŭ 88.000 fine de 2023. La grandan diferencon klarigas la enveno, respektive la antaŭa manko de administra subvencio el Eŭropa Unio (125.000 eŭroj).
La propraj servoj kaj varoj de TEJO (kongresoj kaj periodaĵoj) ŝajnas nur pasivaj, sed la projektoj multe pli pezas: la fama AKSO kostis 97.000 en 2023, kontraŭ “nur” 50.000 en 2022. Praktike la asocio vivas danke al fondusoj de Eŭropa Unio, malgraŭ favora saldo almenaŭ por IJK 2023 (bedaŭrinde fifama pro kvar kazoj de seksa molestado).
La kapitalo kreskis de ĉ. 133.000 al preskaŭ 150.000, kio ne vere kongruas kun la alta profito en 2023. La stabilecon de TEJO oni vidos post la financa raporto pri 2024.
Komentoj
Laŭ la plej lastaj informoj el Bruselo, la ŝuldo de Eŭropa Unio post financado pere de bankaj pruntoj de la ekonomia reakiro post la pandemio COVID-19 kaj la Novgeneracia Verda Ordo jam atingis 20% de la buĝeto de EU. La sola eliro estas novaj impostoj aŭ milito… Eŭroentuziasmuloj, esperantistoj kiuj alkutimiĝis al la komforta vivo pere de subvencioj el EU: preparu vin ekmarŝi al la milita fronto…