La ĝenerala Asembleo de Afrika Esperanto-Instituto estas kunvokita al Bujumburo, ĉe hotelo Amitie”, por lundo 12 februaro 2024 tagmeze. Partoprenos reprezentantoj de ambaŭ kolektivaj membroj (KCE kaj SIPU). Unuafoje ĉeestos por SIPU c-ano Janvier Ndericimpaye, profesie bankisto: li definitive anstataŭas c-anon Abdulrahman Bukuru, migrintan al Popola Ĉinio pro postuniversitata stipendio.
Ene de la raportoj la Asembleo pritraktos la staton kaj statuson de Tanganika Esperanto-Domo, la titoligon de la biblioteko al la karmemora c-ino Marie-France Conde Rey, la renovigon de la Plenum-Komitato, kie alternas prezidanto nomumita de SIPU aŭ KCE ĉiun duan jaron, la rilatojn kun Afrika Centro Esperantista en Lomeo.
La Domo havos novan kortiston ekde 1 februaro 2024, dum la posteno de direktoro, antaŭvidita de la AEI-statuto, restos plu vaka. Necesos ankaŭ nomumi prizorganton de la biblioteko.