La evoluo de la situacio en Afriko restas zorgiga, malgraŭ la probabla atingo de kompromiso pri la sorto de la nuna prezidento de RD Kongolando. Sed pli ol la diplomatio de la romkatolika eklezio, la destinon de Kabila influas lia ĉefa apoganto, la ĉiama diktatoro de Angolo, kiu reprenis siajn apogotrupojn nome de ambigua neŭtraleco. Tiu movo povus efiki ne nur al la eksbelga, sed ankaŭ al la eksportugala Kongolando, nome Kabindo.
Tiu kaj aliaj konsideroj fonis en la hieraŭa diskuto inter sen. Conde Rey, Nguefack kaj Silfer pri la afrika Esperantio. En la interna panoramo gravis la kontinenta kongreso en Tanzanio kaj la nacia kongreso en Togolando, kaj la perspektivo de la unua Internacia Junulara Kongreso.
Pli kaj pli evidentas la tendenco progresigi kontinentan konfederacion, surbaze de UETA. Sen. Chamberline Nguefack informis, ke ŝi ĵus rifuzis la proponon prezidi ĝin, ne trovante tion kongrua kun sia ofico de Konsulo. Aliflanke la Esperanta Civito restas daŭre inspirita de la Deklaracio pri la esenco de la afrika esperantismo.
Estis ekzamenataj kelkaj konkretaj demarŝoj en diversaj afrikaj landoj, specife tiuj kie ekzistas paktinta establo.
La Kapitulo kunvenos en pleno la venontan mardon, 10 januaro 2017.