Per fina omaĝo al Bulgara Esperanto-Teatro (al kiu estis dediĉitaj la kovropaĝoj tra la tuta jaro) ekas la lasta numero de la 39a kolekto de “Literatura Foiro” (decembro 2008). Le Clézio, Nobel-laŭreato, debutas en nia lingvo, per traduko de Perla Martinelli.
LF aperigas plian prelegon el la ĵurnalista kongreso en Vilno: ĉi-foje temas pri Josip Pleadin. Efektive la gazetoj de LF-koop estis la plej atentaj pri tiu unika kongreso. Geraldo Mattos proponas pensovekan studon pri la uzo de preterito en la participoj.
Du aŭtorinoj kontribuas per interesaj rakontoj: Lena Karpunina kaj la debutanta Elena Popova. Pluraj recenzoj pri libroj, sed ankaŭ filmo kaj muzika produktado. Ne mankas kondolenca artikolo (pri Bernard Golden) kaj gratula (pri la 50-jariĝo de la nuna ĉefredaktoro, Ljubomir Trifonĉovski). La revuo fakte lasas spacon al novaj verkistoj, tiel konfirmante sian alvokiĝon de plej longdaŭra kultura periodaĵo en Esperantio: ĝi ja eniros sian 40an jaron, sen ajna paŭzo dum kvar jardekoj — unika kazo por nia lingvo, tre malofta en aliaj kulturlingvoj.
“Literatura Foiro” estas posedata, eldonata kaj administrata de LF-koop. La jarabono 2009 kostas 36 eŭrojn (rabatoj laŭ la rezida lando por la abonantoj kiuj havas la esperantan civitanecon). Provekzemplero estas mendebla ankaŭ tra nia redakcio.