La unua ĉapitro de “Mi estas sloveno – ĉu grave?” de c-ano Vinko Oŝlak, originale verkita en esperanto, premieras en la aŭgusta numero de la revuo “Literatura Foiro” (39a jaro, n-ro 234). La aŭtoro proponas en sia libro novan prinacian kaj priminoritatan paradigmon, fundamentante sian meditadon ĉefe per la Biblio.
Vinko Oŝlak, kiu estris la blankan grupon en la Senato de la Esperanta Civito dum la antaŭa mandato, antaŭ tri jaroj forlasis la romkatolikan eklezion, restante tamen profunde kristana intelektulo. Li certe estas la plej interesa esperantlingva kristana filozofo. Prezidanto de la Esperanta PEN-Centro en 2004-2008.
La verko de c-ano Oŝlak, prespreta, atendas eldononton. Provekzemplero de la revuo kun la ĉapitro el “Mi estas sloveno – ĉu grave?” estas mendebla ankaŭ tra nia redakcio.