PEN Internacia ne kongresos dum krozado sur la Mediteraneo, pro motivoj de sekureco. La definitiva respondo koincidas kun la decido kongresi venontjare en Pollando.
Sekve de pli frua decido de la Asembleo de la Esperanta PEN, krozado tamen okazus en oktobro 2025 aŭ 2026, se Esperanta Naturamikaro konsentus paŭzi rilate al NAKSE dum la koncerna jaro.
La Kongresa Buroo de la Esperanta Civito rekomendas eviti tempan proksimecon al la Esperanta Konferenco en Afriko, pri kiu Afrika Esperanto-Instituto estas engaĝita. Ĝi sugestas kunlabori ankaŭ kun Itala Interlingvistika Centro por relanĉi la Mediteranean Konferencon pri Esperantologio, kiu dum la pasinta jarcento okazis tri fojojn: en Sankta Paŭlo de Ordalo, Triesto, Tel-Avivo.
Definitiva konsultiĝo inter la interesataj paktintaj establoj okazos venontsemajne en Toso-de-Maro, dum la tria NaturAmika KulturSemajno, organizata de Esperanta Naturamikaro.