La nuna prezidanto de Eŭropa Konsilio, Charles Michel, anoncis ke li kandidatos por la Parlamento de Eŭropa Unio, elektota en junio 2024. Se ĉi tiu 48-jara belga liberalulo estus elektita, li devus lasi sian postenon fine de julio, do kvar monatojn antaŭ la fino de sia mandato. Kiu interimos tiam?
Laŭ la proceduraj normoj, lian funkcion transprenus la semestra gvidanto de la Unio, tiukaze Viktor Orban, hungaro kaj suverenisto, kiu ekoficos 1 julio 2024. Konsiderante la diatribojn kaŭzitajn de Orban, ni povas prognozi pliajn problemojn el duobla prezidejo eŭropa.
Kuriozaĵo: la reĝa palaco en Godolo probable estos uzata kiel sidejo de la semestra prezido. Pro la preparaj laboroj ne eblis lui tie la salonon kie disvolviĝu la parlamenta sesio de la Esperanta Civito. En tiu urbeto, interalie, situas la tombo de Kolomano Kalocsay.