La organiza komitato de Kultura Esperanto-Festivalo en 2022 havis hieraŭ sian unuan parte fizikan kaj parte virtualan kunsidon, kunvokitan de c-ano Manuela Blanco. Partoprenis ŝi kaj gec-anoj Anna Bartek kaj Giorgio Silfer, kun s-ro Vincent Chatagny (tri en Svislando kaj unu en Hispanio). Senkulpiĝis gec-anoj Ariele Baldrati, Alessio Giordano, Abasi Nshimirimana (studokupoj), Perla Martinelli (malsano). Ne estis kunvokitaj ankaŭ aliaj helpantoj, kiuj efektive aktivos nur dum KEF, kiel f-ino Annina Naeder, fotisto.
La kunsido traktis proponojn por la programo, kun provizora listo de invitindaj geartistoj, kaj aldone programeroj ne specife podiaj; krome la inviteblaj neesperantistoj, ĉar KEF proponos sin parte ankaŭ al neesperantista publiko (laŭ konsilo de TEJO-vicprezidanto).
Pro la malcerteco pri eventualaj distancoj truditaj de la kontraŭpandemiaj normoj (espereble ne plu validaj) ekestis la orientiĝo lui festivalejon, kiu estas multe pli vasta ol la atendata publiko (inter kvindek kaj cent personoj).
Aldonu komenton