Esperantologia Fakultato 2020 de KCE sukcese startis
Dum la kongresoj ne okazas, aŭ nur virtuale disvolviĝas, Kultura Centro Esperantista realigas sian someran kursaron, kiu komenciĝis hodiaŭ per la Esperantologia Fakultato kaj kulminos en aŭgusto per la kurso pri tradukarto.
Pro bedaŭrinda foresto de d-ino Perla Martinelli (operaciita hieraŭ en Laŭzano) unu el la du monografiaj kursoj ne okazas; kompense, prof. d-ro Davide Astori vastigas la sian, pri Ferdinand de Saussure, iniciatinto de strukturismo en lingvistiko, dum la institucian kurson (pri la kultura historio de Esperantio) gvidas d-ro Giorgio Silfer.
Ekstreme interesa tago stude kaj gastronomie, komentariis unu el la partoprenantoj, itala studento kiu ĵus petis kaj ricevis la esperantan civitanecon. Dum alia partoprenantino, el Hispanio, admiras la altan nivelon de la lekcioj kaj miras pro sia kapablo sekvi ĉion: Esperanto vere estas mia universitato.
En la horoj pri ĝenerala lingvistiko aparta atento estis dediĉita al la problemoj de faka terminologio: naskiĝis la ideo retroviĝi venontjare por terminologia seminario, alirebla de ĉiu lingvemulo, ne nur lingvistoj.
[HeKo 739 4-B, 21 jul 20]
