HeKo 757 9-C, 18 mar 21
En dato 17 marto 2021 la Kapitulo unuanime aprobis la suban raporton de la vickonsulo pri internaj aferoj.
Je la nomo de MILLER Lee, karese Liĉjo, usonano, la Registra Instanco notis plurajn Caveat, unuafoje pro lia enesto en la mem redaktita listo de la “Esperanta Respubliko” (ministro n-ro 60).
HeKo 757 8-C, 18 mar 21
La Konsulo raportis hieraŭ al la Kapitulo pri la eĥo al sia respondo al la interogacio de sen. Anna Bartek pri la delikto de malrespekto al la flago.
TEJO-anoj komprenis ke la respondo ne celis konflikti kun la Junulara, kaj mem zorgis pri forigo de la frazo en Vikipedio kiu kaŭzis la indignon de nia Blanka grupestrino.
“La Akademio de Esperanto deklaras, ke ĝi nun ne alprenas starpunkton pri la uzindeco de ne-oficialaj seks-neŭtralaj pronomoj (kiel ekzemple “ri” aŭ “ŝli”), kaj decidis ne okupiĝi pri tiu temo dum almenaŭ dek jaroj”.
HeKo 757 6-C, 17 mar 21
Post hodiaŭa konsulto kun la Kapitulo, la Konsulo proponas al la Senataj grupestroj kunvoki la ordinaran parlamentan sesion ne plu al Razgrado, sed al Loklo aŭ Ĉaŭdefono.
Ricevinte la lastan permeson de la origina eldonejo, LF-koop finpreparas la preson de “Finalo de partio”, unu el la plej famaj dramoj de Samuel Beckett, ektradukita en 2008 okaze de eksperimenta kurso ĉe Kultura Centro Esperantista, kompletigita kaj reviziita zorge de la kursestrino, c-ino Perla Martinelli.
Kvarobliĝis la kvanto de la realaj partoprenantoj en la 7a Lingva Kolokvo de Kultura Centro Esperantista (28 aprilo—2 majo 2021), por ne mencii ankaŭ la virtualajn, kompare kun la pasinta jaro.
HeKo 757 3-C, 14 mar 21
Per HeKo 726 1-C, 14 jan 20 Komitato Armand (pri esperantistoj en prizono) informis pri krima evento en Kroatio.
Monda San-Organizo aperigis en sia oficiala retejo la esperanto-tradukon de sia kurso “Enkonduko al KOVIM-19: metodoj por detekto, prevento, reago kaj mastrumado”, almenaŭ en la skriba parto. La kurso fakte havas ankaŭ kvinminutan filmon, kiu tamen ne disponeblas en nia lingvo (nek en kelkaj gravaj kulturlingvoj, ekzemple la itala).
HeKo 757 1-C, 12 mar 21
La Konsulo kunvokis la Kapitulon de la Esperanta Civito por merkredo 17 marto 2021, komunikante el Japanio densan tagordon.
Sen. Riichi Karibe intencas ekzameni la sekvojn de sia respondo al la interogacio pri deliktoj kontraŭ la esperanta flago. Tio kupliĝos al raporto de la vickonsulo pri internaj aferoj, kiu krome prezentos informon pri la estonta parlamenta sesio.
Laŭ c-ano Giorgio Silfer, kunaŭtoro de “Historio de la esperanta literaturo”, naciaj antologioj en esperanto estas relative multaj kaj ofte bonaj, sed preskaŭ mankas specifaj antologioj.
La aprila numero (310) de “Literatura Foiro” jam survojas al la abonantaro: la 64-paĝa dumonata revuo proponas ekde ĉi tiu jaro novajn rubrikojn, kun specifa atento pri la literaturoj en minoraj lingvoj kaj pri novaj ĝenroj, kiel komikso, kartuno, porinfana literaturo.
Komitatano Osmo Buller estas malkontenta pro la progresraporto de la Estraro de la Universala, ĵus komunikita al la gvida instanco de la Asocio: “Aperas nenio pri la nova retejo. Pasintjare Duncan [Charters, prezidanto] diris, ke ĝi estos lanĉita la 15-an de decembro. En septembro li diris, ke “ni havu la celon kompletigi la aferon en januaro, kaj plej malfrue en februaro”.
