januaro 2017

Hispana Esperanto-Federacio malaprobis la emancipiĝon de Tutmonda Esperantista Junulara Organizo, voĉdonante kontraŭ la reformo de la koncernaj artikoloj en la statuto de UEA. HEF estas prezidata de Antonio (Tonyo) del Barrio kaj vicprezidata de Ángel Arquillos.

Esceptaj gastoj ĉe la konversacia rondo de Brusela Esperanto-Grupo ĉi-semajne. Sed dum prof. Giorgio Silfer ofte vizitas la belgan ĉefurbon pro okupoj profesiaj kaj reprezentaj, unuafoja kaj unika (espereble ne ununura) estis la ĉeesto de la 82-jara poligloto Vladimir Samodaj el Odeso.

La esperantlingva bildliteraturo ĉeestos venontjare per ekspozicio la Internacian Festivalon de la Bildstrio, la plej gravan en Eŭropo. La decidon alprenis la prezidanto de la paktinta establo Ĉarento Esperanto, okaze de vizito de la korespondantoj de “Literatura Foiro”, kiuj ricevis oficialan akreditivon por la festivalo.

Plena salono, kun geaŭskultantoj venintaj eĉ el Venecilando kaj Sicilio, sekvis hieraŭ la esperantlingvan prelegon de prof. Giorgio Silfer, en la sidejo de la Esperanto-Grupo “Luigi Minnaja” en Romo, pri la sekvoj de la brita secesio al la lingva reĝimo en Eŭropa Unio.