januaro 2017

La EU-Parlamento alfrontos la britan secesion kaj alion prezidate de kristandemokrata deputito: la kandidato de Eŭropa Popola Partio, Antonio Tajani, venkis super sia rivalo de la socialdemokrata grupo, Gianni Pittella.

La projekto “Esperantio vivas”, komiksa albumo redaktita de Giorgio Silfer kaj desegnita de Tihomir Lovriĉ, estis prezentita antaŭpremiere hieraŭ en Budapeŝto, okaze de la 37a Literatura Kafejo, organizita de Fajszi Amika Rondo sub la aŭspicio de Esperanta PEN-Centro. La gastojn enkondukis sen. Anna Bartek, vicprezidanto de FAR.

La nova sidejo de la Orienta Legacio de la Esperanta Civito estis inaŭgurita antaŭhieraŭ en Budapeŝto, per simpla ceremonio kie tre bonvene aperis ankaŭ granda nigrarbara torto.

La fama hungara verkisto István Nemere estis alelektita hodiaŭ al la fonduma konsilio (kuratórium) de Fajszi Amika Rondo. C-ano Nemere estas la sesa konsiliano, apud gec-anoj Nanovfszky, Bartek, Martinelli, Silfer kaj s-ro Biagio Ravasz.

Kiel jam legeble de certa tempo en la titolpaĝo, la novaĵagentejo HeKo havas oficialan poŝtan adreson ĉe la Okcidenta Legacio de la Esperanta Civito, strato Edinburgo 26, BE-1050 Bruselo, Belgio.

La gekolegoj uzantaj informojn el HeKo por artikoloj en siaj paperaj periodaĵoj estas afable petataj sendi pruvekzempleron de la koncerna numero al la supra adreso.

La Vickonsulo renkontis hieraŭ vespere la plej aktivajn belgojn kiuj havas la esperantan civitanecon (senkulpiĝis c-ano Jean-Marie Jacques) kaj aliajn bruselajn esperantistojn, por diskuto pri la eventuala influo de la brita secesio sur la lingva reĝimo en Eŭropa Unio.

Momente preskaŭ ĉiu paĝo pri la KER-ekzamenoj estas fermita.

UEA planas reformojn pri la organizado de la ekzamenoj. Ne klaras, kian rolon www.edukado.net kaj ties redaktoro havos en la nova plano, pro tio ne havas sencon publikigi ajnan dokumenton, priskribon kaj informojn pri la estontaj ekzamenoj.

Por celebri la Internacian Holokaŭstan Memortagon (27 januaro 2017) jam hodiaŭ EU-Parlamento kaj Eŭropa Hebrea Kongreso aranĝas ceremonion ĉe salono Yehudi Menuhin de la EU-palaco Spaak. Alparolos la ĵus elektita parlamenta prezidanto, Antonio Tajani, kaj la kongresa prezidanto, d-ro Moshe Kantor.

Paulo Lima, veterana esperantisto, forpasis hieraŭ en Brazilo. Li fondis, kune kun Fabricio Valle, la socialan grupon Lexus, kiu aĉetis de LF-koop la prestiĝan gazeton “Heroldo de Esperanto”.