februaro 2017

Estas preskaŭ elĉerpita ankaŭ la dua represo de “Historio de la esperanta literaturo”. El la verko de c-anoj Carlo Minnaja kaj Giorgio Silfer nur trideko da ekzempleroj restas en la stokejo de LF-koop, la eldonejo. Certe eblas ankoraŭ provizi ĝin ĉe iu libroservo, sed probable dum pluraj monatoj la titolo ne estos disponebla ĉe la eldonejo mem, atende pri la dua eldono.

Ni invitas partopreni en la konkurso “Poezio el ĉiuj ĉieloj”. La neniam publikigitaj poemoj povas esti en ajna lingvo, kondiĉe ke la konkursanto aldonu la esperanto-tradukon. Eblas ankaŭ sendi originalaĵon en esperanto.

La vicprezidanto de Universala Esperanto-Asocio, Stefan MacGill, estis indikita kiel la Esperantisto de la Jaro 2016 en sondado de “La Ondo de Esperanto”. Sed aliflanke alia sondado de LOdE esprimas pesimismon pri UEA, ankaŭ pro eraroj pri kiuj ĝuste s-ro MacGill kunresponsas.

Ne necesas paroli esperanton por esti fuŝa informadikisto; eĉ male. Tiun veraĵon pruvis hodiaŭ en Budapeŝto la teknikisto kiu eliminis dum tuta tago la retaliron en la palaco de OKISZ, ĝuste kiam ĝi estis plej bezonata por literatura kafejo, kiun pluraj volis sed ne povis partopreni virtuale.

Tre interesaj ALTE-tagoj en Kardifo (Britio) ĉe la Instituto pri la kimra lingvo, kiujn KCE pere de sen. Giorgio Silfer partoprenis reprezentante esperanton, kiel kutime kaj ekskluzive.

La Forumo de la Esperanta Civito diskutos la proponon aktivigi la artikolon 6 de la Foruma Reglamento.

La 8a Afrika Kongreso de Esperanto estas kunvokita al Burundio por la fino de ĉi tiu jaro, laŭ anonco de sen. Frederiko Nimubona. La organizon prizorgus Societo Internacia por la Paco Universala, peresperanta pacifista societo aliĝinta al la Pakto por la Esperanta Civito.

“Se Lexus malakurate pagos en tri sinsekvaj monatoj, LF-koop rajtos rompi la kontrakton kaj repreni la gazeton HdE por si.”

Tiu ĉi klaŭzo en la vendokontrakto koncernas dek unu monatajn partopagojn por “Heroldo de Esperanto”. Ĝi estis enmetita en la kontrakton laŭ propono de s-roj Fabrício Valle kaj Paulo Lima, posedantoj de Lexus, la aĉetanto de HdE.

Dum la pasinta jarcento Kultura Centro Esperantista havis propran informilon: “Monata Cirkulero”, kiun en la nuna jarcento anstataŭis regula rubriko en “Heroldo de Esperanto”.