La Esperanta Civito formale kunlaboras kun la Konsilio de Eŭropo, laŭ ĝia invito kaj pere de Kultura Centro Esperantista, kiu estas unu el la dekkelkaj institucioj oficiale komisiitaj de Strasburgo por analizi la preparatan dokumenton pri lingvotestado por enmigrintoj, rifuĝintoj, azilpetantoj.
Hieraŭ okazis telematika kunveno inter Strasburgo kaj parto de la komisiitoj, kiun partoprenis por KCE gec-anoj Lorena Bellotti kaj Giorgio Silfer. Ili atingis la konsenton ke, kvankam la baza dokumento estas skribita kaj modifebla nur en la angla, ĉiu aparta laborgrupo diskutu en sia lingvo, kaj konsekvence la nia uzos esperanton kiel intralingvon!
Dudeko da esperantlingvaj fakuloj kunvenos en la Esperanto-Domo en Svislando, parte fizike parte telematike, dimanĉon la 8an de novembro, por analizi la dokumenton kaj proponi eventualajn modifojn, sub la gvido de d-ino Bellotti. Inter ili estas jamaj okupiĝintoj pri migrofluoj ĉe alia paktinto (Itala Interlingvistika Centro), ekzemple c-ino Tiziana Rogora, eksministro pri laboro, profesia trejnado kaj migrofluoj de Regiono Lombardio.