Per la junia numero (2367) “Heroldo de Esperanto” komplete reakuratiĝis: la informa organo de Kultura Centro Esperantista montras la viglecon de sia transnacia teamo, kiu produktas interesajn artikolojn kaj disvastigas novaĵojn, kontribuante al la travideblo de Esperantio.
Certe HdE informas prioritate pri la aktiveco de KCE: ĝi publikigas prelegojn el siaj aranĝoj (ĉi-numere artikolon de Giorgio Silfer pri diplomatia kaj geopolitika terminologio), la detalajn programojn de siaj someraj kursoj, la gravajn decidojn de la lasta KCE-Asembleo.
La unua paĝo dediĉas artikolon al Jeanne Calment, la dojeno de Eŭropo, analizon pri lastatempaj agnoskoj pri esperanto, ĉefartikolon pri la Tago de la Esperanta Lingvo. Inter la aŭtoroj jam konstantas tri Civitaj parlamentanoj: Giacomo Cominicini, Alessio Giordano, Honoré Sebuhoro.
Atenton ricevas ankaŭ Greziljono kaj paktintaj establoj, ĉi-foje plej rimarkinde LF-koop.
“Heroldo de Esperanto” estas abonebla pere de Esperanta Kulturservo.