Per agrabla interkona vespero komenciĝis la unua Naturamika Kultursemajno en Esperanto, organizita de Esperanta Naturamikaro en Rozoj (Costa Brava). La aranĝo disvolviĝas en tre gastama hotelo, plus ekskursoj, laŭ la tradicio de iama turisma semajno, nun resurektinta danke al la konsorcio de la Esperanta Civito, analoge al Kultura Esperanto-Festivalo.
La unua mateno de la Naturamika Kultursemajno estis dediĉita al PEN, por ke la publiko orientiĝu pri la asocio kiu fundamentas la aktivecon por la lingvaj rajtoj, ĉe la literaturistoj. La lingva biodiverseco estis la ĉefa temo de la intervjuo de Giorgio Silfer al Carles Torner, farita en la franca kun tuj posta interpretado. La tuto estis tre impresa por la partoprenantoj.
C-ano Alessio Giordano per kurso por progresantoj, sen. Marie-France Conde Rey pri metodikaj spertoj en Afriko, sen. Lorena Bellotti pri lingvotestado kunlabore kun ALTE: la hodiaŭa tago de NAKSE estis karakterizita de instruado.
Juan Garcia del Rio debutis pri filozofio de la naturo kaj pri ĉinaj ideogramoj en la Naturamika Kultursemajno, surprizante per multfaceta kompetento; la duan prelegon li kompletigos morgaŭ. La andaluza intelektulo havas kvalitojn de esperantologo; krome lia filo Angel perfektiĝas lingve kun c-ano Alessio Giordano.
Dum c-ano Antonio Vidal gvidis naturamikojn al tre ŝatata ekskurso, disvolviĝis gravaj asembleoj: la parlamenta sesio de la Esperanta Civito kaj la ordinara asembleo de Esperanta Naturamikaro. Pri la unua vi legos en aliaj raportoj, pri la dua en ĉi tiu HeKomuniko.
Ege interesa seminario pri azilantoj, rifuĝintoj, ekzilitoj kaj ceteraj mislokitoj dum la lasta tago de NAKSE. Antaŭtagmeze prelegis advokato J. Antonio Esteban, kiu kunlaboras kun neregistaraj organizoj, kaj ekrilatis al Esperanta Naturamikaro okaze de samtema studotago en Malago. La publiko, unuavice la Civitaj stabanoj, ricevis kompletan klerigon pri la situacio en Hispanio.
La direktivo pri Komuna Integrita Biblioteka kaj Arkiva Sistemo estis la ĉefa punkto en la tagordo de la Forumo kunvokita al Rozoj, 7 oktobro 2022. Laŭ propono de Itala Interlingvistika Centro kaj Fajszi Amika Rondo, la tekston prezentis c-ano Alessio Giordano.
Dum la Senata sesio en Rozoj, 7 oktobro 2022, la vickonsulo pri financoj raportis pri demando de c-ano Carlo Minnaja, fakte frazo en raporto pri la ĉi-jara kongreso de Itala Esperanto-Federacio, kie kelkaj neregistaraj esperanto-organizoj salutis la kongreson, sed ne la Esperanta Civito. La Senato mallonge diskutis kaj rapide aprobis rekomendon al la Kapitulo.
Sviso povas nomiĝi Habelo, sed ne Kaino. Tiu kaj aliaj foje strangaj malpermesoj situas en la Svisa Kodo, rilate onomastikon. Manke de specifa Civita normo, ili validus ankaŭ en la Esperanta Civito. Dum sia ordinara sesio en Rozoj, 7 oktobro 2022, la Senato forigis tiun efikon, per la unuanima aprobo de aldona amendo al Lex Valeria pri la familia juro.
Esperanta Naturamikaro ne partoprenos en la ordinara jara Asembleo de Naturfreunde Internationale, okazanta ĉi-semajnfine en Alta Italio. La kialo estas simpla: la delegito, c-ano Giorgio Silfer, estas subite retenata en Hispanio post NAKSE, tial devis nuligi ĉiujn rendevuojn planitajn dum restado en Italio, inkluzive de la partopreno en la NFI-Asembleo.
