majo 2023

Ĵus konkludiĝis la naŭa Lingva Kolokvo ĉe la Esperanto-Domo en Ĉaŭdefono (Svislando). Tre interesa enhave kaj gastronomie, la evento arigis dekon da partoprenantoj el Britio, Hispanio, Hungario, Italio, Svislando plus virtuala ĉeesto el Svedio. La unuan tagon (29an de aprilo) inaŭguris interveno de d-ro Alessio Giordano pri la fonologio de esperanto; la duhora prelego estigis longan diskuton, kiu postulis unu plian horon. Partoprenis ankaŭ d-ro Giorgio Silfer, kiu kun Giordano kunaŭtoras projekton de esperanta gramatiko. D-ro Ruben Fernandez Asensio estris debaton pri la rilatoj inter esperanto, lingvistoj kaj bibliotekistoj, kiu akompanis la ĉeestantaron de posttagmezo ĝis la vespermanĝo.

En la oficialaj retpaĝoj de la Neŭŝatela kantono eblas jam vidi la arkitekturan projekton de la nova grandioza arkivejo konstruota en Ĉaŭdefono. Temas pri betona ortangula paralelepipedego (vorto estetike kongrua) kiu staros kuŝe en la valo, inter la dorso de granda komerca centro kaj la fervojo Ĉaŭdefono-Loklo.

Sur la teretaĝo situos du lokaloj por la Centro de Dokumentado kaj Studo pri la Lingvo Internacia. La unua utilus por la kompaktusoj, do oni antaŭvidas ke migros ne nur la arkivo, sed ankaŭ biblioteko kaj hemeroteko. La dua ŝajnas saloneto kiu entenus ankaŭ apartan ĉambreton por sekretariado.

Estas anoncite ke la Esperanta PEN-Centro invitis la PEN-mondkongreson 2024, kaj ke la kongreso disvolviĝos sur ŝipo, ene de krozado sur la okcidenta Mediteraneo.

Por ke PEN Internacia akceptu, necesas garantii dekon da asistantoj por la kunvenoj: porti la mikrofonon al la parolontaj delegitoj, disdoni dokumentojn, helpi kongresanojn ĉe alveno/foriro.

Se vi havas inter dek ok kaj tridek kvin jarojn, parolas flue esperanton kaj almenaŭ unu el la oficialaj laborlingvoj (angla, franca, hispana), krome ŝatus krozadi senpage dum la unua semajno de oktobro 2024, bonvolu kandidatiĝi skribante al la kongresa buroo de la Esperanta Civito: kongres ĉe esperantio.net.

Ĉiu Civita stabano estas afable petata konsulti la Google-kalendaron prizorgatan de la vickonsulino pri internaj aferoj. La plej gravaj kunsidoj estas anoncataj ankaŭ en HeKo, laŭ la dispono de la vickonsulo pri informado. La indikitaj horoj estas tiuj de Svislando (CET).

En junio 2023 kunsidos telematike: la Abeletoj (pri KEF) lundon la 5an je 17h00; la fakrondo pri EIE vendredon la 9an je 17h00; la biblioteka/arkiva fakrondo merkredon la 14an je 17h00; la Formiketoj (pri NAKSE) merkredon la 14an je 18h00; la Kapitulo plus grupestrinoj (tridek-kvina kunsido) merkredon la 21an je 17h00.

Unuafoje en ALTE la kongresanaro povis aŭdi nian lingvon el la podio. Dum la mondkongreso en Madrido (25-27 aprilo 2023) d-ino Lorena Bellotti alparolis la publikon en esperanto, komence de sia prezento kadre de la intervenoj pri lingvotestado por enmigrintoj. Ŝi reprezentis nian lingvon kiel delegito de Kultura Centro Esperantista, komisiita de la Esperanta Civito.

La aŭskultantaro reagis kun pozitiva intereso. Interalie tio motivis la delegacion de Duolingo el Usono (unu el ili parolas nian lingvon) havi fruktodonan interŝanĝon. Duolingo partoprenis ĉar ĝi celas apliki la eŭropan lingvotestan framon al siaj kursoj, kaj montriĝis intereso pri la esperanto-testado.

Konsultinte la Senatajn grupestrojn kaj la Kapitulon, la Vickonsulo “ad acta” modifas la daton kaj lokon de la ĉi-jara Parlamenta sesio, kiu estos kunvokita al Ĉaŭdefono/Loklo por sabato 29 julio 2023, tuj post la fermo de la 12a Kultura Esperanto-Festivalo (KEF), anstataŭ apud Torino kvar tagojn poste. Deko da diversaj kialoj klarigas tiun ŝanĝon.

La kvestoro estas aparte je dispono de la tre malmultaj (fakte nur unu) Civitaj parlamentanoj veturontaj al la Universala Kongreso, por klarigi kiel eblas de Ĝenevo facile kaj komforte atingi Torinon samtage, kaj tiel partopreni en la tuta UK.

La tagordoj de la Senato kaj de la Forumo estos baldaŭ afiŝitaj, post la Kapitula kunsido kunvokita je 24 majo 2023 en Budapeŝto.

Naturfreunde Internationale kunvokis sian 25an Kongreson al Aŭstrio, en Spital am Pyhrn, ĉe la loka naturamika domo, 7 oktobro 2023. Aŭstrio kaj Germanio estas la landoj kun plej multe da delegitoj: kune ili atingas duonon de la Asembleo. Aliaj gravaj federacioj en Eŭropo estas la svisa kaj la nederlanda; sekvas aliaj de meza grando, kiel la franca kaj la itala, kaj pliaj multe pli malgrandaj. Ekster Eŭropo estas rimarkindaj la senegalia kaj la togolanda.

Esperantista Domo pri Kulturo “D-ro Ivan Kirĉev” kaj Esperanto-Societo “L. L. Zamenhof” en Razgrado (Bulgario) invitas al sia festo EKRA — Internacia Krea Renkontiĝo “Abritus”, 16-17 junio 2023. La tuta evento estas dediĉita al sen. Georgi Mihalkov.

En la unua tago oni festos la krean vivon kaj verkaron de tiu fama bulgara esperantisto, pseŭdonime konata kiel Julian Modest, okaze de lia 70-jariĝo. En la dua oni anoncos la rezulton de traduka literatura konkurso bazita sur lia rakonto “Enigmo”.

Enigmo estas ankaŭ kial aliaj esperanto-komunumoj en Eŭropo ne festas la siajn kiel faras la bulgara.

Ekis hodiaŭ en Slovenio la 55a Renkonto de la Verkistoj por Paco, unu el la plej tradiciaj en PEN Internacia, siatempe kongreso de poezio kaj precipe okazo por renkonto de la inteligencioj el oriento kaj okcidento de Eŭropo. La esperanto-literaturo aperas tie ekde 1994, plej ofte reprezentata de c-ano Giorgio Silfer.

Dum la unua ronda tablo aperis lingva demando, nome plendo de oratoro kontraŭ la angla, pro la kreskanta marĝenigo de la franca; tion li difinis “angla imperiismo”. D-ro Silfer intervenis (en la franca, kiel volas la Konstitucio de la Esperanta Civito, por plurlingvaj kongresoj) rimarkigante du paradoksojn. La unua paradokso: viktimo de la “angla imperiismo” estas la angla lingvo mem, ĉar ĝia vehikla uzo certe ne kongruas kun la bela lingvo de Shakespeare.

En dua tago de la internacia PEN-konferenco en Bledo la Pac-Komitato organizis ideopluvon, por enfokusigi la estontan aktivecon de la koncernataj aktivuloj. Nome de la Esperanta PEN c-ano Giorgio Silfer sendis skriban proponon.

“Estas por mi malfacile partopreni en seminario kun laborgrupoj, se ĝi ne estis preparita per telematika konsultado. Tial mi sendas proponon skribe.”

“La 21an de septembro ĉiujare oni celebras Mondan Tagon pri la Paco. Ĉiufoje UN elektas malsaman temon por enfokusigi la atenton. Ĝis nun neniam ĝi elektis “Literaturo kaj Paco”. Ĉi tiu temo kaj la diversaj rilataj iniciatoj estus mastrumeblaj de la Pac-Komitato de PEN Internacia, kiel unufoja projekto”