decembro 2023

La lasta kunsido de la Kapitulo en 2023 hodiaŭ subtenis la proponon de la plej aĝa kapitulano, nome la Unua Vickonsulo, konfidi delegojn al nova vickonsulo, c-ano Ruben Fernandez. Li transprenas de vickonsulo Giordano la delegon pri bibliotekoj kaj arkivoj; rilate al ĉi-lasta, li okupiĝos pri la deliktorikorda informosistemo, necesa por aktivigi la direktivon pri sekureco en publikaj aranĝoj. La meza aĝo de la Kapitulo estas nun 53, signife malpli alta ol dum la antaŭa parlamenta mandato.

La Kapitulo decidis prokrasti plian fortigon de la Registro, per la proponita nomumo de vicmatrikulisto kiu okupiĝu pri la biografia fako. Kun ĝojo ĝi konstatis la pretan tekston de la statuto de Civila Esperanta Servo, kiu fariĝos sendependa establo post du monatoj.

La naturamika Esperanto-Domo (la sola esperantista sidejo en Malago) festis la Tagon de la Esperanta Kulturo je la 15a de decembro 2023, kun la partopreno de pluraj geamikoj, inkluzive de longe forestintaj el esperantlingva medio kaj de aliaj venintaj eĉ el foraj andaluzaj urboj. Ĉio pasis strikte en la lingvo de Zamenhof, inkluzive de kvizo gvidata de Jaime el Kolombio, ĝuste pri la vivo kaj verkaro de la Majstro.

La feston organizis sen. Manuela Blanco, sekretario de Esperanta Naturamikaro, kaj malfermis s-ro Juan Garcia del Rio, prezidanto. La naturamikoj retroviĝos en la unua labora ĵaŭdo de januaro, por sia semajna renkonto. La Asembleo de ENa estas proponita por 14 marto 2024.

Tradicia donaco por s-ro Claude Gacond en la ĉi-jara Tago de la Esperanta Kulturo: interesan libron alportis c-ino Perla Martinelli, prezidanto de Kultura Centro Esperantista, kaj sen. Giorgio Silfer, vicprezidanto de Pro Esperanto. Temis pri la sola vizito kiun la 92-jara eksdirektoro de KCE ricevis precize la 15an de decembro.

S-ro Gacond vivas nun en kadukulejo de Ĉaŭdefono post grava akcidento, kiun li suferis ĝuste dum sia lasta naskiĝtago: bedaŭrinde la kruroj ne plu bone subtenas lin. Lia edzino loĝas aŭtonome ankoraŭ en la hejma vilao.

Pri la Esperanta Civito oni parolos 29 decembro 2023 matene en Wiesbaden dum jubilea Novjara Renkontiĝo, danke al prezento de la bildromaneto “Esperantio vivas” fare de sen. Giorgio Silfer, Vickonsulo. Li klarigos la ideon utiligi komikson por informi pri la esenco kaj estonteco de tiu nova kaj unika subjekto, kaj pri la pozitiva efiko de tiu metodo. Ekzempleroj de la verko (desegnita de sen. Tihomir Lovriĉ) estos je dispono de la publiko.

La prelegonton (kiu preferas la difinon de diskutanto ĉi-foje) enkondukos s-ro Lu Wunsch-Rolshoven, ĉefa organizanto de NR, lastatempe dungita de la Universala kiel responsulo pri (nemovada) komunikado.

Afrika Esperanto-Instituto selektis la partoprenontojn en la staĝo por la formado de redaktistoj, kiu disvolviĝos en la Tanganika Esperanto-Domo (Bujumburo) dum februaro 2024. Ili estas Mushosi Birindwa,* Guy Roger Ileka Ljondjo, Lucien Kagina,* Arlain Kizeyidoko Mayinda, Joel Muhire, Frederiko Nimubona,* Francois Mauriac Nunda,* Honore” Sebuhoro* (asterisko se ili havas la esperantan civitanecon).

Aldone: Koffi Gbeglo* staĝos en Togolando, en alia AEI-aranĝo, se Afrika Centro Esperantista konfirmos; Espoir Ngoma Kasati* staĝos en Svislando, antaŭ IJK, se li iros al IJK 2024; Abasi Nshimirimana* staĝos en Hungario, se li iros al la parlamenta sesio 2024.

Interesa debato pri la nuna interŝemida milito, hodiaŭ dum la Novjara Renkontiĝo en Wiesbaden (Germanio), organizita de EsperantoLand. Post enkonduko de ak. Jesper Jacobsen kun konciza historia retrospektivo ekde la kreo de la brita mandato en Palestino, la ĉeestantoj esprimis diversajn sintenojn, en panoramo kiu inkluzivis nur unu ekstremon (Israelo kulpus pro ĉio) dum mankus cionisma ekstremo aliflanke.