HeKo 825 9-C, 10 nov 23
Pro la forpaso de la karmemora emerita Konsulino, sen. Marie-France Conde Rey, necesas laŭvica anstataŭigo en la Senato de la Esperanta Civito, per la unua el la neelektitoj de la Verda Listo; en kazo de egaleco, la pli aĝa rajtas je ŝia posteno. La koncerna persono naskiĝis en la sama jaro kaj estis edukita en la sama lingvo, kvankam ne en la sama lando.
Dum la Esperanta PEN bonfartas, dudek ses aliaj centroj dise tra la mondo estas eliminitaj de la asembleo de la delegitoj, okaze de la lasta (nur virtuala) mondkongreso de PEN Internacia. La malplej tuŝita kontinento estas Eŭropo, kun nur du ĉesigitaj centroj: la sardinia kaj la rusa.
HeKo 825 7-C, 8 nov 23
Estos baldaŭ preta la propono de direktivo interalie kontraŭ seksa molestado en esperanto-kongresoj, preparata de komisiono el parlamentanoj de Feminisma Esperanta Movado, Esperanta Naturamikaro kaj Itala Interlingvistika Centro.
La oktobra numero de “Heroldo de Esperanto” (2348) en 2023 dediĉas la unuan paĝon grandparte al la dua NaturAmika KulturSemajno en Esperanto (NAKSE), sukcese okazinta en Rozoj. La internaj paĝoj, male, donas ekvilibran atenton al iniciatoj en Eŭropo kaj Afriko.
Kiam afrikano lernas fremdan lingvon, li strebas gajni finance el tiu lernado. Se ekzemple li lernas la germanan, li povos serĉi laboron en Germanio. Se li lernas esperanton, li klopodu serĉi laboron en Esperantio.
La Vickonsulo de la Esperanta Civito gastos en la klubo kie membras la prezidanto de la Universala, en urbo Sankta-Luiso, Usono. D-ro Silfer estas invitita por prelegi pri la 54a jarkolekto de “Literatura Foiro”, kies kovriloj estas dediĉitaj al la temo: “La kontribuo de la kongresoj al la esperanta kulturo”.
“Raŭmismo estas la strategia esenceco de esperantismo kaj servas kiel motoro de la esperantistaj arĥivoj.” Al tia konkludo alvenis c-ano Ruben Fernandez, kies magistra disertacio en la kataluna pri arkivistiko ĵus ricevis “approbatur cum laude” ĉe la universitato de Barcelono.
HeKo 825 2-C, 3 nov 23
La Konsilio de Fondumo Pro Esperanto funebras pro la forpaso de sia ĝisnuna prezidantino, sen. Marie-France Conde Rey Pigeon. Dum ŝia, devige modesta, festo pro mil kaj unu lunoj, en aŭgusto 2023, konsilianoj havis la ĝojon kunsidi kun ŝi en Angulemo kaj tie ekzameni la lastan projekton, nome novan Esperantan Gastodomon en Svislando.
HeKo 825 1-C, 3 nov 23
Tre malĝoje mi anoncas la forpason de Marie-France la 2an de novembro 2023 posttagmeze.
Ŝi estis tre laca, sed Nathalia kaj Serge, ŝia gastiganta familio, faris la maksimumon por ŝi.
Estas grandega perdo por Charente Esperanto, la asocio kiun ŝi kreis en Angulemo, por la Esperanta Civito, por Esperanto kaj por ĉiuj kiuj aprezis ŝin. Ŝi trovos lokon en niaj koroj.
HeKo 824 9-C, 2 nov 23
Lastatempe okazis pluraj nomumoj ĉe instancoj de la Esperanta Civito kaj/aŭ establoj aliĝintaj al la Pakto.
Por la Parlamento: Itala Interlingvistika Centro nomumis c-inon Cristina Stefani kiel duan delegiton, apud c-ano Alessio Giordano; Esperanta Naturamikaro nomumis c-anon Antonio Justicia kiel duan delegiton, apud c-ano Antonio Vazquez.
En dato 20 oktobro 2023 Lennart Svensson atestis klopodon de bibliocido en Svedio, ĉe Esperanto-Garden, kies responsulo li estas. La ateston de c-ano Svensson parte kontestas kaj parte konfirmas s-ro Sten Svenonius el Malmo.
La 7an de oktobro 2023, en la sudo de Israelo mem, hebreoj spertis pogromon de vasta dimensio, kies viktimoj estis ankaŭ iliaj eksterlandaj gastoj.
