Hodiaŭ oni memoras la viktimojn de la Holokaŭsto, per la Internacia Tago dediĉita al ili (rezolucio 60/7 de UN je 1 novembro 2005). Tiutage en 1945 la pretervivintoj en la koncentrejo Auŝvico estis atingitaj fare de la Ruĝa Armeo.

Jen bona okazo (re)legi la tre interesan artikolon pri la savo de la 25.000 bulgaraj hebreoj en “Literatura Foiro” n-ro 221, junio 2006.

Agentejo Reuters informis, ke la Pola Radio elsendos en la hebrea ekde marto 2007, por plifirmigi la rilatojn inter Pollando kaj Israelo kaj por refuti la reputacion de poloj kiel antisemitoj. La unuaj elsendoj estos kelkhoraj.

La Esperanta PEN-Centro referendumis inter siaj membroj pri la eventuala kandidato al la Nobel-premio pri literaturo. El la selektita kvino (Marjorie Boulton, Miguel Fernández Martín, István Nemere, Giorgio Silfer, Spomenka Ŝtimec) du verkistoj ricevis tri, respektive ses voĉojn. Ĉi-lasta, akceptinte la proponon, estos kandidatigita por 2007.

Claude Nourmont Moon, vicprezidantino de UEA, skribis en “La Ondo de Esperanto” (1:2007, p. 14) ke:  “Fonto” ne malaperas, sed nur paŭzas, kaj estas studata reaperiga plano.

Dum la semajno de la Monda Socia Forumo mortis du gravaj personecoj, kiujn MSF honoris: la franca filantropo Abbé Pierre kaj la pola ĵurnalisto Ryszard Kapuczinski. La kronikista talento de ĉi-lasta estas ĝuebla ankaŭ en esperanto, per la verko “Ebono”, tradukita de c-ano Tomasz Chmielik. La kvindek mil partoprenantoj en la Monda Socia Forumo honoris ambaŭ personecojn.

La ĝisnuna Konsulo, c-ano Walter Zelazny, ricevis de la baldaŭa, c-ano Giorgio Silfer, la informon ke la propono pri la nova Kapitulo estas preta. En la inaŭgura sesio de la Parlamento la nova Konsulo formale anoncos la konsiston de sia teamo, kun la respektivaj delegoj.

Esperantista domo de kulturo “D-ro Ivan Kirĉev”, Razgrad (Bulgario), anoncas internacian literaturan konkurson pri poezio kaj humuraĵoj, originale verkitaj en esperanto “EKRA-2007”, je libera temo. La verkoj ne devas esti ĝis nun publikigitaj en periodaĵoj, partoprenintaj en aliaj konkursoj aŭ afiŝitaj en Interneto.

Fakuloj el Francio, Hungario, Italio, Svedio kaj Svislando partoprenos en la seminario pri la LingvoTesta Sistemo de la Esperanta Civito, organizita de KCE en Ĉaŭdefono sabaton la 27an de januaro 2007, de mateno ĝis vespero.

Okaze de la inaŭguro de la Monda Socia Forumo en Najrobo aperis la kvara numero de “Afrikume”, la afrika cirkulero de Kultura Centro Esperantista, distribuota ankaŭ kiel suplemento de “Heroldo de Esperanto”.

Al la Transnacia Radikala Partio
Maurizio Turco, Marco Beltrandi, Marco Cappato
vicprezidantoj

Nome de la Blanka grupo en la Senato de la Esperanta Civito kaj de mi persone, mi firme subtenas la kampanjon kaj la iniciaton de s-ro Marco Pannella. Ni kontraŭas la mortpunon kiel etike ne permeseblan punon.

La eliranta Konsulo, prof. d-ro hab. Walter Zelazny, oficiale kunvokis la unuan parlamentan sesion de la nova mandato 2007-2011, per kiu li transdonos la prezidon de la Esperanta Civito al la ĉefkandidato de la Verda Listo, gajninta en la baloto por la Senato, c-ano Giorgio Silfer.