Mankis nur kvin numeroj, kaj Kreŝo Barkoviĉ estus atinginta la rekordan nombron de tricent numeroj de “Sennaciulo” sub sia redakto – kio ankaŭ koincidus kun dudek kvin jaroj da redaktoreco, ĉar li enposteniĝis en aprilo 1982.

Koincide kun la Zamenhofa Tago (Tago de la Esperanta Kulturo, laŭ la Civita Konstitucio) okazos en ok lokoj de la mondo la balotkontrolo pri la elektoj por la Senato de la Esperanta Civito.

Pri naŭ ĝeneralaj celoj estos organizataj la aktivecoj de la partoprenantoj en la Monda Socia Forumo (Najrobo 20-25 januaro 2006):

1. Konstruado de mondo de paco, justeco, etiko kaj respekto pri la diversaj spiritecoj.
2. Liberigo de la mondo el la regado de la multnacia kaj financa kapitalo.

Vera Jordan naskiĝis en Rio de Janeiro la 11an de Decembro 1948. Profesie ŝtata instruistino. Ŝi esperantistiĝis en 2002 kaj membriĝis al Kultura Kooperativo de Esperantistoj en januaro 2003. Ŝi aktive partoprenis en preskaŭ ĉiuj Festoj de la Datrevenantoj de KKE kiel kantistino kaj ankaŭ prezentiĝis en pluraj E-eventoj.

Kvar projektoj estas plenumotaj en Afriko fare de la Esperanta Civito, jen rekte jen subsidue al paktintaj establoj, dum la nova jaro 2007.

La 28an de novembro mortis Teo Jurukov, aktoro kaj reĝisoro bulgare kaj esperante. Lia alta, minca figuro, iom donkiĥota, lin karakterizis sur la scenejo, kie li impresis kaj komike kaj elegante, kun trafa adapto al diversaj roloj. Lia voĉo estis same karakteriza kiel lia figuro: basa sed potenca, gardanta certan hieratikon eĉ en la komikaj roloj.

La plej legata ĉiutaga gazeto en Bulgario, “Trud”, kies eldonkvanto estas la plej granda en la lando, hodiaŭ aperigis tutpaĝan intervjuon de Mariela Baleva kun d-ro Giorgio Silfer. Mariela Baleva estas unu el la plej popularaj ĵurnalistinoj en Bulgario, kies artikoloj, komentarioj kaj intervjuoj ofte instigas viglajn diskutojn en la amaskomunikiloj kaj en la socio tie.

Malgraŭ admonoj de diversaj flankoj, inkluzive de siaj membroj, UEA konservis kaj eĉ kreskigis la nombron da diskutlistoj ĉe Yahoo. La admonojn motivis la indigno pro la konduto de Yahoo en totalismaj landoj, kiu helpas la reĝimojn persekuti disidentojn, tiel malhelpante interalie la lingvan kaj kulturan diversecon, kiu ŝajnas grava por la nuna UEA.

La 30a de novembro 2006 estas la unua efektiva censotago en la historio de la Esperanta Civito. En 2001 fakte ekzistis nur provizora registro, bazita sur la tuta membraro respektive abonantaro de la paktintaj establoj; sed neniu ricevis jam la esperantan civitanecon.

La Slovena PEN-Centro alvokas al sia Internacia Konferenco, en Bledo, 28 marto — 1 aprilo 2007. La temo de la unua ronda tablo estos: “Minacataj lingvoj – malaperantaj kulturoj”; la dua ronda tablo traktos pri “Legado kiel socia evento”; dum la Pac-Komitato de PEN Internacia diskutos pri “La post-totalisma rezistado”.

La Naturamika Semajno de Kultura Centro Esperantista estas la unusola ĉiujara naturamika kaj ekologia aranĝo en esperanto, kun internacia (eĉ interkontinenta) karaktero. Ĝin gvidas tre kompetente c-ano Francisko Degoul, agnoskita alpa gvidisto.