La Kapitulo de la Esperanta Civito estas kunvokita al skajpa kunveno, 19 septembro 2017. El la sep membroj, tri situos samloke, en urbo Malago. Unuafoje partoprenos c-ano Libéré Mudende, nova vickonsulo pri socialaj aferoj.
La 13an de septembro vespere la redakcia direktorino de Unesko-Kuriero, Jasmina Šopova, dissendis mesaĝon al dek sep funkciuloj de Unesko. En la mesaĝo ŝi kunsendis al la kolegoj tri fotojn pri Unesko-Kuriero en esperanto senditajn de mi.
Mia abonsistemo ne estas bazita sur la civila jaro (esprimo uzata en Brazilo por nomi la jaron de januaro al decembro), sed surbaze de la fluo de la tempo ekde la abono. Tio estas, pro la nuna malfruo Lexus ne devos eldoni kaj sendi numerojn de la antaŭaj monatoj: la abonantoj ricevos ĉiujn numerojn, ekde la normaligo de mia situacio.
La Administra Komitato de LF-koop kunvenos en Budapeŝto, 15 oktobro 2017, sub la prezido de d-ino Perla Martinelli. En la tagordo situas la tri proponoj de aĉeto de la gazeto “Heroldo de Esperanto”, kies proprieto revenos al la kooperativo je Novjartago 2018.
UEA aĉetis apartamenton por luigi ĝin al TEJO (je merkata tarifo), sed TEJO nun serĉas loĝejon en/apud Roterdamo por tri homoj kiuj volontulas en la Centra Oficejo.
TEJO anoncas ke “la volontuloj estas valoraj junuloj kiuj laboras por la bonfarto de la organizo. Helpi ilin signifas kontribui al la progresigo de esperanto”.
