decembro 2018

Sociala Grupo Lexus eldonis nur tri numerojn de “Heroldo de Esperanto” por la jaro 2017, kaj ĵus anoncis rezignon pri la kolekto 2018.

Morgaŭ en Sofio oni festos la 60-jariĝon de Bulgara Esperanto-Teatro, al kiu “Literatura Foiro” dediĉis ĉiun kovropaĝon de la jarkolekto 2008, tiu de la ora jubileo. Tiuokaze en la n-ro 231 (februaro) Ljubomir Trifonĉovski longe intervjuis Belka Beleva, kiu revuis duonan jarcenton da aktiveco.

“Dum IJK la Komitato ne aprobis la financan raporton pro manko de bilanco. La kasistino diris ke UEA ne donis la informojn al TEJO, por ke ŝi povu fari la raporton, do ni petis ke ŝi provu denove kaj donis limdaton de la 30a de septembro” skribis komitatano Robert Nielsen al la TEJO-Estraro fine de septembro.

En la bonega studio de pianisto Francesco Cipullo en Molizo (Italio) ekis hodiaŭ matene la registrado de la kantoj kaj kanzonoj por la kompakta disko “Kanti klasike”, eldonota de LF-koop venontjare. La tekstojn tradukis aŭ adaptis precipe Giorgio Silfer kaj Nicolino Rossi.

Kvardeko da gejunuloj aktive partoprenis la unuan zamenhofan feston de Islama Esperanta Klubo, hodiaŭ posttagmeze en Buĵumburo,en ĉeesto de la Konsulo de la Esperanta Civito, de la Unua Vickonsulo kaj de la vickonsulino pri informado.

Li kutimas loki siajn dramojn “en Eŭropo ie, ne tre for de la Danubo ie”, sed ĉi-foje Giorgio Silfer ŝanĝis la kontinenton: “En orienta Afriko ie, ne tre for de granda lago ie”.

Laŭ informo de Aleksander Korĵenkov, la gazetara konsilisto de la sveda ambasado en Moskvo estis ĵus forpelita de la Rusa Federacio kiel “persona non grata”. La traktado kiun li ricevis estas tiu kiun oni kutimas rezervi al spiono.

La kvina Afrika Esperantologia Semajno ekas en Buĵumburo. Ĝin organizas Kultura Centro Esperantista, sub la aŭspicio de la Esperanta Civito. Partoprenantoj estas atendataj el Kongolando, Ruando kaj Burundio.

La 19an de decembro Unuiĝintaj Nacioj aprobis “migropakton”: temas pri dokumento kiu ne devontigas la membroŝtatojn, sed nur enkondukas la koncepton de “rajtoj de mislokitoj”. Probable tial la Ĝenerala Asembleo de UN aprobis ĝin je grandega plejmulto: 152 voĉoj poraj, nur kvin kontraŭaj kaj dek du sindetenaj.