“Mi bedaŭras informi vin ke en nia lasta kunsido la estraro de TEJO decidis ne gastigi la fizikan IJKn 2021. Ni scias ke malfacilas antaŭvidi la situacion fine de julio, sed ĉio indikas ke daŭre sufiĉe malfacilos vojaĝi eksterlanden” ĵus anoncis Carlos Pesquera Alonso, vicprezidanto de Tutmonda Esperantista Junulara Organizo.
HeKo 760 5-C, 13 apr 21
Ekde aŭgusto 2010 aktivas fondumo Pro Esperanto, surbaze de Lex Argentaria. Per tiu leĝo aplikiĝas la artikolo 28 de la Konstitucio de la Esperanta Civito, kaj ekestis la “Civita banko”, kun la celo progresigi la esperantan popolon en la sektoroj financa, konstrua kaj sociala.
HeKo 760 6-C, 14 apr 21
Antaŭ dek jaroj, fine de majo, forpasis nia granda amiko kaj eminenta verkisto Leen Deij. Longe kaj prosperige li kontribuis al “Literatura Foiro”, “Heroldo de Esperanto” kaj “Femina”. SAT-ano jam en la 1930aj (aŭtoro de la teksto de la SAT-himno), li petis la esperantan civitanecon jam en 2001 kaj membris en la Kortumo.
HeKo 760 7-C, 15 apr 21
La Konsulo kunvokis la Kapitulon al la monata skajpa kunsido, 22 aprilo 2021, en la tria ĵaŭdo anstataŭ la tria merkredo, ĉar unu el la vickonsuloj forestos en misio.
Pro la restriktoj de la pandemio en Alta Italio la Komitato de Itala Interlingvistika Centro estas kunvokita al Ĉaŭdefono, okaze de la Lingva Kolokvo de KCE, 30 aprilo 2021 je 18h00: ĉiuj membroj ĉeestos reale, unu scienca konsilanto partoprenos virtuale.
La redakcio de “Literatura Foiro” kunsidos en la Esperanto-Domo de Svislando, 29 aprilo 2021, sub la kunordigo de la ĉefredaktoro, c-ino Perla Martinelli. Partoprenos reale la ĉefredaktoro kaj la redaktoroj pri kino (Conde Rey), teatro kaj historio (Giorgio Silfer), minoraj literaturoj (Alessio Sacha Giordano), komikso kaj kartuno (Daniele Binaghi).
HeKo 761 1-C, 19 apr 21
Estimataj gvidantoj de Esperanta Civito, Unesko unuafoje enketas per Esperanto. UEA alvokas ĉiujn esperantistojn partopreni. Ĵus Unesko informis ke ili ricevis 600 respondojn de esperanto-parolantoj, kaj ili atendas ankoraŭ pliajn milojn el Esperantujo. Ju pli multaj esperantistoj plenigos la enketilon, des pli klare la lingva valoro estos videbla al Unesko.
HeKo 761 2-C, 20 apr 21
Sen. Tihomir Lovriĉ, membro de la opozicio en la Civita Parlamento, samtempe aktivulo en Civila Esperanta Servo (rango: pacisto), atingis Afrikon, kie dum tuta monato li deĵoros ĉe la Tanganika Esperanto-Domo.
“Ĝi estis malgrava revueto el medio regata de judoj”. Tiel hungara ministro antaŭ nelonge difinis la revuon “Nyugat”, kies rolo estas enorme grava en la historio de la hungara, sed ankaŭ de la esperanta literaturo: sen ĝi ne ekzistus “Literatura Mondo”, nek la apogo al esperanto ĉe PEN Internacia, fare de Frigyes Karinthy en la 1920aj kaj fare de aliaj poste.
HeKo 761 4-C, 23 apr 21
La Kapitulo kunsidis hieraŭ telematike sub la prezido de la Konsulo, sen. Riichi Karibe. Al la pleno mankis nur la Vickonsulo, sen. Julio Herrero, kies misfarto vekas pli kaj pli da zorgemo.
