Ni festas hodiaŭ ne nur la 70an naskiĝtagon, sed ankaŭ alian jubileon: István Nemere, la plej fekunda verkisto en la hungara literaturo (pli ol sescent libroj), parolas esperanton de duona jarcento.
Poezio aparte abundas en la numero 271 (oktobro 2014) de “Literatura Foiro”: krom la uvertura kanzonteksto di Massimo Acciai, revenas post longa tempo la ĉina lirikisto mao zifu (laŭ lia kutimo, minuskle), kiu, spure al Proust, serĉas sian perditan tempon per rigide ritmaj dekunusilaboj. Al li respondas kolekteto de poemoj de Gerrit Berveling, kun histori-mitologia fono.
Preskaŭ ĉiuj elstaraj zamenhofologoj aliĝis al la diskutlisto de Scienca Instituto Zamenhof, kie la plej verva kontribuanto estas c-ano Francisko Degoul.
