Post la somera paŭzo la naturamika Esperanto-Domo rekomencis hieraŭ siajn “verdajn ĵaŭdojn”, la solajn regulajn renkontojn de esperantistoj en Malago. Interalie ĝi gratulis la Vickonsulon, okaze de lia hodiaŭa 75-jariĝo.
S-ro Etsuo Miyoshi komunikas: “Rezulte de la reklamkampanjo pri Esperanto kaj posta letera kampanjo estiĝis rekta kontakto kun la Eŭropa Komisiono. Nun la departamento “Lernejoj kaj Multlingveco” konfirmis, ke por la projektoj de Erasmus+ kaj Kreema Eŭropo (Creative Europe) Esperanto estas samrajta kun aliaj lingvoj inkluzive de regionaj kaj minoritataj lingvoj.
La oktobra numero de LF, la 331a, jam survojas al sia internacia abonantaro. Kiel oni rimarkis el la kvar jam presitaj numeroj, la ĉi-jaraj kovropaĝoj elstarigas la pentraĵojn de Maja Gorova, vicprezidantino de Bulgara E-Asocio kaj filino de la esperantista verkisto Ĥrima Gorov, kies belartaj kompetento kaj sentemo evidentiĝis per pluraj ekspozicioj lokaj kaj internaciaj.
Morgaŭ la KoKuSo de la Verda Listo oficialigos sian kandidataron por la Senato de la Esperanta Civito, elektota 15 decembro 2024. La nomlisto estos sendita al la Kortumo kaj la Registro, por la necesaj juraj kaj teknikaj kontroloj. Kortumano Stano Keable ĉefe responsas pri tiu tasko.
La 90a kongreso de PEN Internacia ekis hodiaŭ en Oksfordo, per laborkomisionoj antaŭ la oficiala inaŭguro. Sub la preteksto de sekureco, la kunsidoj disvolviĝas en periferia granda hotelo, kie neniu eksterulo rimarkas ĝin.
Nia lingvo ricevis dufoje atenton hodiaŭ dum la PEN-mondkongreso en Oksfordo. Certe tio okazis raŭmisme, do ne per propaganda alparolo pri la neceso adopti esperanton por ŝpari la kostojn de interpretado…
Rezolucio pri esprimlibero en Palestino kaj Israelo, proponita unuavice de la angla PEN, dividis la kongreson hodiaŭ, en ĝia tria tago. La germana kaj la pola centroj deklaris kontraŭan voĉon, taksante la tekston misekvilibra.
La elektoj al la Senato por la jarkvino 2025-29, okazontaj 15 decembro 2024, vidas c-inon Lorena Bellotti en la unua posteno de la Verda Listo, laika progresema ekologia.
