Direktivo Eriksson-Giordano

Pri la sekureco en publikaj esperanto-aranĝoj

1. Principoj 

1. Inspirite de la Manifesto de Raŭmo pri “kongresoj kiel vojo al kresko”, la Esperanta Civito zorgas ke ĉiu publika aranĝo (kun)organizata en la cirkvito de la Pakto disvolviĝu en sekuraj kondiĉoj. 
2. Ĉiu paktinta establo (kun)organizanta kongreson, festivalon, konferencon, simpozion, kolokvon aŭ similan publikan aranĝon aplikas ĉi tiun direktivon celantan preventi, haltigi, denunci, verdikti delikton okazintan kadre de la koncerna evento, specife seksan moleston, fizikan, parolan aŭ skriban agreson, ŝtelon, vandalismon, kaj tiel plu. 
3. La normoj en ĉi tiu direktivo komplementas sed ne anstataŭas tiujn en la kodoj kaj leĝaro de la ŝtato kie okazas la aranĝo. Esceptas la deliktoj specife normigitaj de la Esperanta Civito, kiel malrespekto al flago aŭ propagando por militrifuzo. 

2. Ĝenerala preventado

1. La paktintaj establoj evitas (kun)organizi aranĝon en loko koncernata de: 
   1. malrespekto kontraŭ unu el la tridek homaj rajtoj laŭ la Universala Deklaracio de 1948; 
   2. alta procento de nepunitaj krimoj, specife feminicidoj; 
   3. milita stato; 
   4. konstanta danĝero de natura katastrofo; 
   5. proksima danĝero de nuklea aŭ armea akcidento; 
   6. geografia izolo kaj granda distanco de sanitara servo; 
   7. deklarita epidemio. 
2. La paktinta establo (kun)organizanta aranĝon devas informiĝi por eventuala aliĝrifuzo pri la homoj trafitaj de: 
   1. denunco pro seksa molestado; 
   2. agreso parola, skriba aŭ fizika aŭ ia ajn violento; 
   3. distingo kiel “persona non grata” laŭ daŭre valida decido de la Kapitulo; 
   4. malpermeso eniri kongreson pro decido de la Kortumo; 
   5. denunco pro ne solventeco (ŝuldo ne pagita). 

La supraj informoj situos en deliktorikorda informosistemo, konsultebla ĉe la Registra instanco, laŭ Lex Lubomira kaj la koncerna aplika dekreto. 

3. Surloka preventado 

1. La paktinta establo (kun)organizanta aranĝon nomumas respondeculo(j)n pri la sekureco dum la tuta aranĝo, nomata(j)n gardanĝelo(j). 
2. Ĉiu problemo rilata al sekureco estas denuncenda al la gardanĝelo(j). 
3. Ĝentile, diskrete kaj konfidence, kun psikologia komprenemo, la gardanĝelo(j) superrigardos la situacion. La gardanĝelo(j) devas esti facile rekonebla(j) dum la aranĝo. 
4. La gardanĝelo(j) kunlaboras kun loka kongresa komitatano komisiita de la paktinta establo. 
5. La gardanĝelo(j) kaj la komisiito rajtas komune decidi pri forigo de kongresano. 
6. Kaze de denunco, se la kongresano havas la esperantan civitanecon, li rajtas apelacii ĉe la Kortumo. 

4. Sekvoj de denunco 

1. Pro denunco fare de kongresano, la gardanĝelo(j) kaj la komisiito agas konforme al la art. 3 de ĉi tiu direktivo. 
2. La denunco estas komunikenda al la Kortumo, kaj komunikinda al la enlanda polico laŭ diskrecio de la gardanĝelo(j) kaj komisiito. 
3. La Kortumo verdiktos kontraŭ la denuncito(j) kiel arbitracia instanco. 
4. La verdiktoj ĉe la Kortumo rilatas unuavice al eventuala forbaro el esperanto-aranĝoj kontraŭ la denuncito agnoskita kiel kulpa. La forbaro estas aplikenda laŭ jara kadenco (12, 24, 36, ktp monatoj). 

5. Financa klaŭzo 

1. La persono trafita de verdikto pro kulpeco fare de la Kortumo pagas la administrajn kostojn (fiksotajn de la Kortumo) pro la arbitracio al la Civita Banko. 
2. La Kortumo povas verdikti financan riparon de damaĝo kontraŭ la persono agnoskita kiel kulpa. 

(aprobita de la Forumo la 20^an de majo 2024)