Septembro kun multaj delegacioj
La septembra agendo enhavas plurajn internaciajn kongresojn kaj konferencojn, kie nia lingvo kaj ĝia parolkomunumo alestas nur danke al establoj aliĝintaj al la Pakto por la Esperanta Civito.
PEN Internacia organizas la ĉi-jaran mondkongreson en Suda Koreio: delegito de la Esperanto-Centro estos d-ino Chiara Macconi el Milano. Ŝi jam konstante reprezentas nin en la Komitato por verkistoj en prizono.
En la aŭtunaj fakaj kunvenoj de ALTE nur KCE anoncis partoprenon kiel reprezentanto de esperanto. La kunvenoj disvolviĝos ĉe la universitato de Sofio, kaj nia delegito estas sen. Marco Cattaneo, kun surloka helpo de sen. Ljubomir Trifonĉovski.
Sen. Giorgio Silfer estis specife kaj insiste invitita de la Hungara PEN por prelegi dum regiona konferenco fine de septembro en Budapeŝto. Li prezentos nian literaturon, nome de la Esperanta PEN. Pli frue, kiel privata publicisto, prof. Silfer vizitos la literaturfestivalon en Mantuo, eble la plej faman en Italio.
Esperanta Naturamikaro siavice estis invitita al la Ĝenerala Konferenco de Naturfreunde International, kies sidejo estas en Vieno. Pri la rilatoj kun Vieno delonge ENa komisiis gec-anojn Giorgio Silfer kaj Loni Sandermann.
[HeKo 514 4-B, 4 sep 12]
