Kvar novaĵoj okupas la ĉefan temlinion de Heroldo de Esperanto 7/2006 (13 maj — 2 jun 06): ĉefartikolo de la Konsulo, prof. d-ro hab. Walter Zelazny, okaze de la kvina datreveno de la promulgo de la Konstitucio de la Esperanta Civito (HeKo 300 1-C); informo pri la inaŭguro de la unua monumento al Karol Wojtila fare de esperantistoj, en Italio; reflektoro al la “monstra” rokbando Lordi, kie ludas eksulino de la esperanta ensemblo Dolchamar; raporto el la PEN-mondkongreso en Berlino.

Esperanto estos unu el la tri oficialaj laborlingvoj (kun la franca kaj la angla) en la internacia konferenco kiun la Esperanta PEN-Centro organizos en Ĉaŭdefono meze de julio 2008, pri la temo “Kia rolo por la verkisto en la Eŭropo de la XXI jarcento?”.

La invito estis formale akceptita fare de la prezidanto de PEN Internacia, okaze de ĵusa regiona konferenco en Milano.

La Deklaracio pri la esenco de la afrika esperantismo estas jam disponebla en tri lingvoj: krom la esperanta originalo, ankaŭ en la franca kaj la angla, danke al c-ano Attaglo, pedagogia direktoro de Institut Zamenhof, kiun posedas TIETo, paktinta establo.

Je la 14a de aprilo 2006 la Deklaracion subskribis jam 75 individuoj kaj ok kolektivoj en dek sep afrikaj landoj. Ĝi estas la unua grava ideologia dokumento produktita de la afrika Esperantio.

Esperanto ĉeestos oficiale en la Tagoj de la Katedro pri homaj rajtoj de la verkisto, kun la koopero de Unesko, en Milano (kongrescentro “Palazzo delle Stelline”, korso Magenta 61, metrostacio Conciliazione), 16-18 junio 2006, laŭ invito de la organizanto, la itala PEN-centro.

En la trideko da literaturoj estas reprezentata ankaŭ la nia, pere de prof. Giorgio Silfer, kiu prelegos itallingve pri: “La danĝero estas mia idiomo: verki en esperanto en la nazia Germanio”. Lia prelego, aperonta en la kongresa libro, analizas la redakcian linion de Teo Jung dum la unuaj kvardek monatoj de la Hitlera kanceliereco, ĝis lia elmigro al Nederlando.

Estos tri la kandidatlistoj por la elektoj de la Senato de la Esperanta Civito. Laŭ la komunikita disponeblo, po du elirantaj senatanoj kandidatos en la Blanka listo: Nelly Holevitch kaj Anna Lászay, kaj en la Ruĝa: Dieter Rooke kaj Mayra Núñez Hernández; dum en la Verda el la elirantaj kandidatos almenaŭ Marie-France Conde Rey, Judit Felszeghy, Anatoli Gonĉarov, Ivaniĉka Maĝarova, Bertil Nilsson, Ljubomir Trifonĉovski, Walter Zelazny — estas probablaj, sed ne certaj, la rekandidatigoj de Perla Martinelli kaj Marco Picasso.

Sabate, 10 junio 2006 je 16a horo oficiale estis inaugurita la nova sidejo de la Esperantista Domo de Kulturo “D-ro Ivan Kirĉev” — Razgrado, en ĉeesto de lokaj esperantistoj kaj kvardeko da gastoj el tuta Bulgario. Inter la speciale invititaj estis la Vickonsulo de la Esperanta Civito, Ljubomir Trifonĉovski.

Poste en la salono de la filharmonio okazis koncerto de kantgrupoj funkciantaj ĉe la esperantista kulturdomo, kiu komenciĝis per la Zamenhofa poemo “Ho, mia kor” ”. Estis proklamitaj la rezultoj de la Internacia Literatura Konkurso EKRA-2006, en kiu, per siaj verkoj, partoprenis 26 aŭtoroj el 11 landoj.

Jen la rezultoj de la internacia literatura konkurso EKRA-2006, organizita de Esperantista Domo de Kulturo “D-ro Ivan Kirchev”, Razgrad (Bulgario), sub la aŭspicio de Literatura Foiro.

Poezio
Unuaj premioj al: Petro Palivoda (Ukrainio), Marie-France Conde Rey (Francio), Nicolino Rossi (Italio), Jaroslav Krolupper (Ĉeĥio), Elena Popova (Bulgario).
Duaj premioj al: Benoît Philippe (Germanio), Penka Papazova (Bulgario), Danĉo Danĉev (Bulgario), Michel Clément (Francio).
Tria premio al: Peter Browne (Usono), Neide Barros Rego (Brazilo), Gereltogtokh Dagva (Mongolio).

Prozo
Dua premio al: Massimo Acciai (Italio).

Humuraĵoj
Dua premio al: Leif Nordenstorm (Svedio).

Kultura Centro Esperantista organizos en Ĉaŭdefono, 29-30 julio 2006, la unuan lingvotestan sesion laŭ la ALTE-normoj, inspiritaj de la Konsilio de Eŭropo. Tiuj normoj, adaptitaj specife al esperanto, estas formulitaj sub la siglo LTSEC (LingvoTesta Sistemo de la Esperanta Civito).

La anoncita lingvotesta sesio ne enhavos la nivelon C2, nome la plej altan. Detala, kvankam ne oficiala, priskribo de la lingvotesta sistemo aperis en Heroldo de Esperanto. Personoj, kiuj jam havas diplomon, povos peti la ekvivalentigon che KCE.

Marie-France Conde Rey, Vickonsulino pri edukado

La prezidanto de la politike neŭtrala Universala Esperanto-Asocio tiele respondas al gazetara komuniko de “Esperanto” Radikala Asocio:

Esperanto-Gastejo 60. Norde kaj Kultura Centro Esperantista memorigas pri la Skandinava Esperantologia Semajno en Leŝefoŝo/Lesjöfors, Svedio, 25-30 junio 2006 (alveno la 24an). Estas la lasta tago por ricevi rabaton kiel frupaginto!

La Skandinava Esperantologia Semajno (SkES) celas profundigi ĉe la partoprenantoj la lingvajn konojn, vastigi ilian esperanto-kulturon (historie, literature, muzike) kaj enkonduki ilin al formiĝo kiel kadroj je la servo de la esperanto-popolo (didaktiko, redaktado, organizo), ankaŭ per postkursa retpreparado. SkES samtempe preparas al la trapaso de lingvotestado je nivelo C1.

Gvidanto de la seminario: prof. Giorgio Silfer.

Informas: egarden [ĉe] esperanto [punkto] se (egarden[at]esperanto[dot]se)

La dua AfrES — Afrika Esperantologia Semajno okazos jarfine 2007 en Bujumburo (Burundio). Instruos c-ano prof. Giorgio Silfer. Surloka organizanto estos c-ano Mushosi Birindwa.

La dua AfrES ne rezultos el la kunlaboro inter du paktintaj establoj, kiel estis por la unua jarfine 2005 (KCE kaj TIETo). La projekto dependos rekte de la Civita Kapitulo, kvankam eblas ankoraŭ specifa kontrakto inter Kultura Centro Esperantista kaj burundia paktonta establo.