Dum du jardekoj for de la malnova Esperantio, reaperis Jerzy Leyk danke al la nova, prelegante hodiaŭ en la simpozio de Kultura Centro Esperantista pri la provoka temo “Kiam malaperis la Esperanto-movado? Kiu perspektivo nun?”. La interveno de d-ro Leyk konsistis el tre profunda retrospektivo, sed multe pli prudenta prognozo.
Retrospektive brila, kelkloke eĉ dokta, ankaŭ la tria hodiaŭa prelego en la simpozio de KCE pri “Horizontoj de la nuna Esperantio”, fare de c-ano Alessio Giordano, vicĉefredaktoro de “Literatura Foiro”.
Sennacieca Asocio Tutmonda havis 680 membrojn en 2006, laŭ komuniko de ĝia tiama prezidanto. La lasta numero de “Sennaciulo” raportas pri 370 membroj, el kiuj 251 repagis sian kotizon kaj 101 pagis nur por 2023, do malfruas por 2024. Do la membraro duoniĝis dum tri jardekoj, se realisme konsideri la malfruantojn.
