C-ano Aleksandro Melnikov gastis hieraŭ ĉe la Esperanto-Domo en Malago, kadre de vojaĝo kiu ebligis al li la preskaŭ kvindekan landon en lia vivo: Ĝibraltaro.
En Andaluzio li etapis renkontante lokajn esperantistojn, kun agrabla prezento pri la bedaŭrinde ne ĉiam agrabla situacio en Rusio. Estis interese aŭdi la impresojn de homo kiu vivas en la lando, kaj rakontas unuamanajn detalojn.
Ĉu oni vivas bone en Rusio nuntempe? Certe la embargo de Okcidento damaĝas precipe la neriĉajn homojn; sed almenaŭ ĝi donis impulson al la revigliĝo de agrikulturo, en kelkaj areoj, pro la neebleco importi fruktojn kaj legomojn. Ĉu la embargo malfortigis prezidenton Putin? Fakte ne: li estas pli populara ol antaŭe ĉe la ĝenerala opinio.
Rusio transiris ofte de unu ekstremo al la alia. Ekzemple la multiĝo de preĝejoj, eĉ kiam ili estas superfluaj. Aŭ la krizo de la distribua sistemo, se temas pri librovendado.
Oriento sentas bezonon dialogi kun Okcidento. Certe endas dialogi kun Rusio, same kiel kun Turkio, kiel ajn malfacila tio estus.