Kolokvo kaj asembleoj en Ĉaŭdefono

Intensa monatfino en Ĉaŭdefono, kie la Esperanto-Domo gastigos kolokvon, du asembleojn kaj tri komitatkunvenojn 26-29 februaro 2016.

La interna kolokvo pri “Vivanta lingvo de vivanta komunumo” estos specife dediĉita al denaskismo. Post enkonduka prelego pri “Infana dulingvismo kaj ĝia esperanta varianto” fare de c-ano Giorgio Silfer, la kolokvo prezentos la atestojn de diversaj aktivuloj.

C-ino Marie-France Conde Rey pri “Avine al nepa denaskulo, tra Renkontiĝo de Esperantistaj Familioj”. F-ino Sonja Muhlemann, denaskulino, pri “Verda mostro mi tamen ne estas”. C-ino Perla Martinelli pri “Patrine al denaskulinoj en la 1960aj”. S-ro Claude Gacond pri “Observante kiel esperanto-instruisto esperanto-familiojn”.

Konkludan debaton gvidos c-ano Bertil Nilsson.

La 27an posttagmeze disvolviĝos la ordinara Asembleo de KCE, kaj la 29an posttagmeze la Ĝenerala Asembleo de LF-koop. Krome kunvenos la fonduma konsilio de Pro Esperanto kaj la Administra Komitato de LF-koop. El la Asembleoj kaj la fonduma konsilio eble fontos grava novaĵo pri nemoveblaĵo.