HeKo 328 8-C, 21 apr 07
Kultura Centro Esperantista oficiale partoprenis per propra delegito, c-ano prof. Giorgio Silfer, en la kolokvo de Konsilio de Eŭropo pri la sekvoj de la Komuna Eŭropa Framo de Referenco, okazinta en Sèvres kaj Parizo 17-20 aprilo 2007.
La kolokvo donis la ŝancon firmigi la rilatojn inter KCE kaj la ceteraj lernejoj kaj ekzamencentroj agnoskitaj kadre de internacia asocio. Tiurilate, KCE specife kunlaboras kun la hungara ITK: seminario pri la LingvoTesta Sistemo de la Esperanta Civito (bazita sur KEFR) estas planata en Budapeŝto, ĉe ITK, por la tria semajno de oktobro 2007.
La apliko de KEFR en la lingvoekzamena sistemo eŭropa montras relativan malfruon. La Esperanta Civito tiurilate vivas en la aktualeco, ĝuste tra LTSEC, dum la tradiciaj ekzamenaroj ankoraŭ distancas de la indikoj el la Konsilio de Eŭropo. Plej distanca ŝajnas la (nur duŝtupa) propono de UEA/ILEI: certe ne sufiĉas aperigi la tradukon de unu ĉapitro de la KEFR-libro, por reformi tutan ekzamenaron.
Laborkunsido pri la rezultoj de la pariza kolokvo disvolviĝos ĉe KCE dimanĉon la 29an de aprilo, laŭ invitoj.
Aldonu komenton