julio 2024

La Kapitulo kunsidis hodiaŭ en Ĉaŭdefono sub la prezido de la Vickonsulo, sen. Giorgio Silfer. Du tagorderoj estis traktitaj kun invitita stabano, c-ano Alessio Giordano. La unua koncernis la rilatojn kun Unuiĝintaj Nacioj: la Kapitulo rimarkis paralelismon inter la sinteno “se mortas UEA, mortas esperanto” kaj la sinteno “Sen UN, esperanto ne havas ŝancon”; kaj konstatis ke ambaŭ estas malrealismaj.  La dua koncernis la ekspansion de la Civita konsorcio en la virtualo; aprezinte lastatempan progreson, la Kapitulo starigis fakrondon por la flegado de ĉiuj retejoj kaj la ĉeesto en sociaj retoj.

“La nuna situacio ene de TEJO ne indas pluekzisti ĉar ĝi ja antaŭvidigas ĥaosan malvigliĝon de nia amatega TEJO.” Tiel c-ano Espoir Kasati el Kongolando komencas tre maltrankviligan mesaĝon al la Komitato de TEJO, en kies elekta komisiono li membras. “Niaj komisionoj estas vere tre silentaj escepte de kelkaj”, li asertas. “La malvigliĝo de pluraj komisionoj kaŭzas foreston de TEJO sine de la junularo esperantista kaj jen junuloj malaktiviĝas kaj ekmankas eĉ kandidatoj.”

“Ni provis kontakti plurajn, sed ŝajne ilin okupas porlaboraj farendoj tiel, ke eĉ havi tempon por TEJO jam ne eblas” insistas Kasati, kiu plurfoje mencias la unujaran prezidinton Alberton S. Garrido kiel modelon de gvidanto.

Malgraŭ la sukcesoj de la dekstraj, eĉ ekstremdekstraj partioj  dum la lastaj elektoj, en 2024-29 la Parlamento de Eŭropa Unio estos regata de la sama majoritato, konsistanta el kristandemokratoj, socialdemokratoj, liberaluloj kaj verduloj. Ĉi tiu majoritato atingis hieraŭ vastan plimulton reelektante s-inon Ursula von der Leyen ĉefkomisaro, kaj pli frue eĉ pli grandan plejmulton reelektante s-inon Roberta Metsola prezidanto de la Parlamento.

La Esperanta Civito aŭspicias simpozion organizatan de Kultura Centro Esperantista en Ĉaŭdefono, 1-3 novembro 2024, komence de la kampanjo por la elektoj de la nova Senato, kiuj okazos en dekkvino da balotejoj tra la mondo, 15 decembro 2024. Al la ĉeftemo “Horizontoj de la nuna Esperantio” kontribuos (en fizika ĉeesto, krom unu kazo) tre valoraj aktivuloj, laŭ la suba kompletigota listo (en alfabeta vico).

La magistrato de Subirato inaŭguris 6 julio 2024 en Sankta Paŭlo de Ordalo (Katalunio) la Centron de Dokumentado pri Esperanto, en ĉeesto interalie de la invitita c-ano Rubeno Fernández, vickonsulo pri bibliotekoj kaj arĥivoj. La municipa retpaĝo tiel priskribas la eventon en la kataluna:

“Temas pri muzea propono prezentanta selekton de objektoj el la kolekto de apotekisto kaj eminenta esperantisto, Lluís Hernández Yzal, fondinto de la unua muzeo en la tuta hispana ŝtato dediĉita al la lingvo esperantista, la “Hispana Esperanto-Muzeo”, en 1968.”

La venontjara Internacia Junulara Kongreso estas kunvokita al Indonezio, la islama lando kun plej granda populacio en la mondo. Tutmonda Esperantista Junulara Organizo tamen anoncis nek daton nek lokon, kaj des malpli la konsiston de organiza komitato.

Ekzistas esperanto-klubo en Ĝakarto (“Esperiga Suno”), laŭ Facebook apenaŭ aktiva post la pandemio. La orienta legacio de la Esperanta Civito registris dek unu nomojn (kaj adresojn), danke al Islama Esperanta Klubo, aliĝinta al la Pakto. Kontaktojn kun Indonezio havas precipe Feminisma Esperanta Movado, ankaŭ paktinta establo, danke al siaj rilatoj kun Internacia Virina Konsilio.

La esperanta literaturo ĉeestos la mondkongreson de PEN Internacia, en Oksfordo 24-27 septembro 2024. En la vespero de la lasta tago (vendredo) nia delegito, d-ro Giorgio Silfer, parolos pri la rolo de Esperanta PEN-Centro kaj PEN ĝenerale, se li estos invitita de Londona Esperanto-Klubo.

Dum la mondkongreso la delegitoj ricevos la broŝuron “Konciza kultura historio de la esperantlingva komunumo” en du lingvoj (franca kaj hispana) kaj la unuan informilon pri la literatura krozado organizota en 2026 fare de la Esperanta PEN.

La sola Esperanto-Domo (kaj sola Esperanto-Centro) en Svislando havas de multaj jaroj la saman telefonan numeron, kvankam iam al ĉiuj numeroj en la kantono oni antaŭmetis la ciferon 9: do 267407. Tute hazarde tiu numero enhavas sekreton.

La 26^an de julio 1974 Kultura Centro Esperantista subskribis lukontrakton kun la civito de Ĉaŭdefono, laŭ kiu jam de kvindek jaroj KCE okupas du apartamentojn teretaĝe de strato Postiers 27.

En 1978 la civito vendis la domon al la fondumo Gastejo Edmond Privat (23 novembro 1976 — 21 marto 2002), kies luanto KCE fariĝis, ĝis sia aĉeto 14 junio 1999, enskribita en la kadastro 17 julio 1999. Konsekvence KCE jubileas ore pri sia nuna sidejo kaj arĝente pri ties proprieto.

La esperanta traduko de “Asertas Pereira” estos prezentata en ĉeesto de la vidvino de la aŭtoro, Antonio Tabucchi, dum la tria Naturamika Kultursemajno en Esperanto, Toso-de-Maro 20-26 oktobro 2024. Maria José De Lancastre ofte korespondis kun la tradukintino, Perla Martinelli, kaj estas entuziasma pro la nova libro, eldonita de LF-koop.

La plej fama romano de Tabucchi estas renkonto de estetike valora fikcio kaj psikologia, pli ol ideologia, evoluo al kontraŭfaŝismo en la Portugalio de 1938. La verko gajnis gravajn premiojn en Italio kaj estas tradukita al pli ol dudek lingvoj. 

“Okazis vere unua elekto de Komitatano C, dum ok jaroj ekde starigo de tiu ĉi kategorio de Komitataneco. Ni bezonis multajn aferojn pristudi, serĉi, konfirmi, rekonfirmi, plani… Fine ni sukcesis!” Tiel jubilas la ĝenerala sekretario de TEJO, Michal Matúšov, anoncinte la rezulton de la elektoj por la unusola reprezentanto de la senkotiza membrokategorio “Junaj Amikoj de Esperanto”. Tiu kategorio inkluzivas ĉiun eksan TEJO-anon ne jam super la tridekkvina aĝjaro, plus ajnulojn kiuj sin anoncis per retpaĝo: unu paŝon plian, kaj oni havus la kategorion “postvivaj membroj”…